新聞節目 - RTHK
A A A
氣溫 濕度
新聞重溫 可重溫過去12個月的新聞

新聞節目

分享工具 facebook
投資多面睇
投資多面睇
節目簡介:
選定不同投資產品跟大家介紹,讓你了解風險與回報,好作精明決定。
主持人:
勞家樂

2021-07-13
金融熱話:投委會主席黃嘉純論投資者教育

現正播放: 金融熱話:投委會主席黃嘉純論投資者教育
分段播放:
金融熱話:投委會主席黃嘉純論投資者教育  收聽facebook
主持:香港市民在理財知識和能力的表現如何?

黃嘉純:根據經合組織國際金融理財教育網絡(OECD/INFE)一項横跨26個國家及經濟體的國際性調查,香港在理財知識同能力排名第一。

這調查主要喺睇三方面,包括市民嘅知識、行為、同埋態度。香港人喺知識排第1,行為排名第6,態度排第14。調查結果反映香港市民具備理財知識,但行為同埋態度方面則有待改善

投委會亦在疫情前進行一項研究,評估市民理財知識和能力,發現受訪者入面有16%冇儲錢,22%表示如果失去家庭主要收入來源,將無法維持3個月以上嘅生活費用,反映市民嘅理財知識同習慣仍有改善嘅空間。

主持: 疫情持續,如何影響市民的投資及理財習慣?

黃嘉純:本港經濟及就業情況持續低迷,最新失業率達到6%,雖然較之前稍為回落,但礙於2019冠狀病毒病疫情仍未過去,失業率高企預計仍會繼續。

疫情下好多家庭都面對收入減少嘅壓力。面臨龐大嘅財政負擔,大家需要維持收支平衡,亦要整投資策略,減低風險。

我哋亦注意到,疫情下好多活動轉到網上進行,例如消費、理財等等。根據投委會本年三月嘅調查發現,疫情促使更多人採用數碼理財服務。四分之三(75%)受訪者表示於去年曾經使用數碼理財服務,最常用的分別是網上銀行(70%)、網上支付(57%)和網上投資(43%)。約一半受訪者表示在2020年較前一年更頻密使用數碼理財服務,尤其網上支付。更多市民會使用呢啲網上平台,但亦同時有不法之徒乘機騙財。

因此,社會面對著疫情、失業率上升、人口急速老化以及投資騙案增加嘅情況下,理財教育嘅重要性顯而易見。

主持:你提到疫情下好多活動轉到網上進行。我有啲朋友而家都唔會去銀行分行,而係直接網上進行。但係網上銀行都會有保安、網絡安全等問題,作為普通用家,用網上銀行戶口,有咩要留意?

黃: 市民要特別注意網絡安全風險,我簡單講3個要點
· 第一:密碼係用來登入你網上戶口嘅重要鎖匙,記得要定期更改密碼、設定一個唔容易俾人估到嘅密碼
· 第二:保密你嘅個人資料,特別喺密碼、銀行戶口同信用卡嘅資料,同埋個人資料,千其唔好隨便俾呢啲資料比陌生人
· 第三:小心欺詐網站、偽冒電郵去套取你網上銀行密碼或者信用卡嘅資料

主持: 過去數月,加密貨幣(如比特幣)價格非常波動,不少市民加入炒賣行列。投資加密貨幣存在甚麼風險?

黃嘉純:喺香港,比特幣、以太幣(Ether)、狗狗幣(Dogecoin)呢啲加密貨幣都係被視作虛擬商品或虛擬資產,並唔係法定貨幣。佢冇政府、任何銀行、發行人或實物嘅支持,亦唔具備成支付媒介或電子貨幣嘅條件,所以未能喺日常生活中普遍使用。

有市民或會出於收藏或炒賣嘅心態買入唔同嘅加密貨幣。但加密貨幣或未有任何實物支撐,幣值可以大上大落,出現劇烈波動。

例如比特幣上年7月係九千幾美元,今年4月升到超過六萬三千美元,但係6月又跌咗接近一半,去到三萬幾美元。可見比特幣、加密貨幣呢啲投資屬於高度投機性質嘅活動。

除咗價格高度波動之外,更加可能涉及流通性不足、潛在市場操縱行為等風險。

投資者必須加倍小心,投資前了解加密貨幣嘅風險,切勿跟風投機。

值得關注嘅係,今年第一季牽涉虛擬貨幣嘅投資騙案,更佔整體投資騙案宗數嘅55%,不法之徒利用呢啲新嘅投資概念去騙財。

主持:金融市場瞬息萬變,又有好多新嘅投資機會、產品,要小心揀選啱自己嘅投資,同時又要小心遇上投資騙案俾人呃錢,所以係四方八面都要留意。投委會對市民有何建議,等我哋做個精明投資者?

黃嘉純:投委會專責提升香港市民嘅理財能力,希望市民可以做到財務穩健,應對人生不同階段嘅挑戰。我哋建議大家可以有三方面特別留意﹕

第一,日常要做到審慎妥善理財,檢視自己的財政狀況,尤其關注組成財務健康嘅六大關鍵範疇,包括儲蓄、債務、保險、投資,以及係長遠而言非常重要嘅退休同遺產安排

第二,做個精明投資者,投資前先求知,了解自己風險承受能力同財務情況,認識投資對象

第三,保護好自己財產,小心騙案,唔好俾騙徒花言巧語迷到,以為有必賺嘅投資機會

香港作為領先嘅國際金融中心,有好多唔同類型嘅金融產品同服務俾投資者選擇,有啲亦係相當複雜,所以我哋建議市民要多啲增進自己理財同投資知識,多留意各方面嘅資訊,裝備自己,包括投委會定期發佈嘅資訊。投資者亦需要緊密關注市場發展,並考慮經濟大環境同市場波動,仔細評估係咪需要調整個人投資組合;同時要應提高對網絡詐騙的關注,在態度及行為上作出轉變,保護自己免受損失。

主持:香港作為國際金融中心之一,理財投資產品同服務日新月異。所以教育市民持續發展呢方面嘅知識,係投委會重點工作之一,當中亦包括加密貨幣。所以,大家若想增進自己投資理財知識,防止受騙,不妨多參考投委會網站,去www.ifec.org.hk睇多啲有關資訊。