新聞節目 - RTHK
A A A
氣溫 濕度
新聞重溫 可重溫過去12個月的新聞

新聞節目

分享工具 facebook
投資多面睇
投資多面睇
節目簡介:
選定不同投資產品跟大家介紹,讓你了解風險與回報,好作精明決定。
主持人:
勞家樂

2021-07-20
金融熱話:投委會主席黃嘉純論唱高散貨

現正播放: 金融熱話:投委會主席黃嘉純論唱高散貨
分段播放:
金融熱話:投委會主席黃嘉純論唱高散貨  收聽facebook
主持:社交媒體流行,網絡上有很多財經界名人被冒充向散戶提供投資貼士,又有所謂「微信女」騙案,現時本港有哪些類型的投資騙局特別盛行?

黃 :警方數字顯示,今年第一季投資騙案宗數達到297宗,超過舊年同類騙案宗數一半。嚴重嘅係,第一季投資騙案損失金額(19.6億元),超出過往五年每一年嘅全年水平。

而投委會今年做咗一項調查,了解市民使用數碼理財服務嘅情況。調查指出,有近半(47%)受訪者曾經遇網上騙案,近一成(9%)更因此而蒙受金錢損失,平均損失金額超過17,000港元。受訪者最常遇到嘅網上騙案包括以偽冒電郵或電話套取銀行戶口資料(26%)、網上購物騙案(12%)及以偽冒電郵要求轉賬(10%)。

網上騙案嘅情況令人非常擔憂,隨住數碼理財服務,以及社交媒體愈來愈普及,相信網絡騙案嘅威脅會有增無減。

社交媒體近年成為騙徒「唱高散貨」嘅平台,佢哋會先喺低位買入一啲低市值或低流通量嘅股票,當股價逐步攀升時就會係社交媒體大力推介呢啲股票,務求喺短時間內製造大量需求,令股價繼續上升,咁騙徒就可以喺高位散貨,謀取暴利。

主持 :騙徒通常會透過什麼手法接觸受害人繼而犯案?

黃: 騙徒通常利用社交媒體接觸受害人,並冒充知名財經界專家或公眾人物,建立社交媒體專頁或者群組。佢哋會係平台上吹噓自己過往投資戰績,炫耀個人財富,以此增加說服力。有啲騙徒會以俊男美女形象,向受害人故作關心、噓寒問暖博取信任。

騙徒繼而會係炒股群組提供一啲投資建議同推介,包括所謂嘅獨家貼士、內幕消息等。起初佢哋會有啲較穩陣同「大路」嘅股票推介,以免除投資者嘅疑心。最初投資者跟買可能會賺少少,並對佢哋產生錯覺,以為佢哋真係投資專家。

下一步,騙徙就會推介一啲市值同流通量低的細價股,務求引人接貨。事實上佢哋已經一早喺低位吸納,吸引投資者接貨後,佢哋就可以高價散貨,謀取暴利。之後股價好快大跌,跟風買入嘅投資者就會損失慘重。

主持:而家好多時我哋都會無端端被加入一啲投資交流通訊群組,上面有人會大講投資心得,或者俾冧把。有啲人可能又會由得佢,或者都會間唔中望吓佢哋講啲乜。

黃:但凡有人主動提出股票貼士或者其他投資建議,往往都係唱高散貨騙局嘅跡象。有啲投資者可能覺得入呢啲群組無乜蝕底,又可以望下其他人講乜,對呢啲群組無太大戒心。騙徒就係正正利用人呢個心態,行第一步棋將你加入群組,引誘你入局。

群組內啲成員可能會一唱一和,或者大打溫情牌,慢慢引你墮入唱高散貨騙局。所以如果被加入呢啲不知名群組,應該馬上退出群組、刪除對話,唔好俾騙徒有機可乘。

主持: 散戶應該如何提防,以免墮入投資騙局?

黃: 投資騙局嘅基本特質都係利用人嘅貪念,而低風險、高回報嘅投資機會作招徠,又吹噓機會難逢,好快可以賺到錢,以引誘受害人入局。受害人好多時係只聽對方貼士,無自己分析做功課。

有啲騙徒更會冒充持牌人士,例如一啲我哋喺媒體上見到嘅分析師、金融界人士,向我哋推介股票。所以喺社交媒體見到任何人嘅投資推介,包括聲稱係持牌人士,單單查閱他們嘅牌照或者註冊並唔足夠,我們更需要進一步核證佢真實身份。

投資者任何時候都要保持清醒,小心求證他人嘅投資建議,並由多角度了解清楚投資風險、產品資料、前景等等先作出投資決定,唔應該隨便跟風。咁樣騙徒就算用啲咩花言巧語亦唔會輕易誤導到你。

投委會網站有好多關於騙局同埋防騙息,其中包括「反網絡詐騙測試」,測試大家對騙局陷阱嘅警覺性、容唔容易成為網絡騙案受害人。

投資者亦要多啲留意警方公布新聞,了解騙徒最新行騙手法,提高警覺。警方嘅反詐騙協調中心,亦有介紹各種流行的騙案及提供最新的騙案警示。

主持: 投委會有什麼工作協助散戶提防投資騙局?

黃:我哋同政府機構、金融界、教育界及社福團體合作,向公眾提供所需嘅理財知識及工具,以助港人能作出有根據嘅財務決定,妥善管理個人財務。

投委會今年三月推出「香港理財月」同大型防騙宣傳教育活動,透過不同嘅活動同媒體宣傳,例如喺社交媒體進行拆解投資騙局嘅直播講座、電視、電台、社交媒體,以及互聯網播放防騙宣傳廣告,提醒市民要留意網上理財、投資同埋網絡安全,提防騙徒詐騙手法層出不窮。我們會繼續密切注視騙局手法同趨勢,並透過投委會錢家有道網頁同不同媒體渠道,向市民提供投資騙局防騙教育。